與您分享，
簡上仁為配合「恆春國際民謠音樂節」活動中【台語兒童歌舞劇：恆春三怪】的需要，所寫的五首歌曲。劇情如何，就請您自己想像囉 ~
一、美麗山谷阮家園（詞曲/簡上仁）
山是厝，水是飯，美麗山谷阮家園，
隨風吹，弄舞花，踮在樹林覓相找。
落山風是風流哥，四界佮人佇相褒，
檳榔珍仔媒人婆，牽人姻緣百年好。
大欉樹，細欉樹，牽手跳舞無憂愁，
小蝴蝶，愛tshit迌，到處賞花唱山歌。
二、哢叮咚（詞曲/簡上仁）
（一）哢（啊）叮咚（咧），哢（啊）叮咚，唱歌跳舞心花香，
哢（啊）叮咚（咧），哢（啊）叮咚，遊山玩水心輕鬆。
進一步！進二步！退一步，無人敢擋我的路，
跳一下！轉一圈！車畚斗，世界我上敖。
來！來！來，來！來！來，唱歌的囝仔袂做歹，
來！來！來，來！來！來，佮阮（我們）唱歌笑咳。
（二）哢（啊）叮咚（咧），哢（啊）叮咚，唱歌跳舞心花香，
哢（啊）叮咚（咧），哢（啊）叮咚，遊山玩水心輕鬆。
唱高唱低無問題，無人比我唱較濟（多），
思想枝、望春風、補破網，唱歌最內行。
來！來！來，來！來！來，唱歌的囝仔袂做歹，
來！來！來，來！來！來，佮阮（我們）唱歌笑咳。
三、恆春二怪V.S.光光兄弟（詞曲/簡上仁）
（弟弟）哎唷，哎唷，哎唷，哎唷喂！電腦出現大妖怪。
（二怪）哇哈哈！哇哈哈！阮上厲害。
（阿兄）奇怪，奇怪，奇怪，真奇怪！怪頭那會伸出來。
（兄弟）看恁外厲害，看恁外厲害，摃到予恁落下頦，
看恁外厲害，看恁外厲害，打到予恁倒頭栽。
（檳榔珍）跳跳跳跳跳呀，跳出來，我是民謠大師來所派。
（兄弟）驚死人，哎唷！驚死人！
（落山風）衝衝衝衝衝呀，衝出來，掠彼咧歹囝仔我上愛。
（兄弟）驚死人，哎唷！驚死人！
（二怪）看恁有外歹，看恁有外歹，阮欲掠恁去交差。
看恁有外歹，看恁有外歹，掠恁入去深山內。
（兄弟）阮不愛，阮不愛，阮不愛！
（二怪）誰叫恁學甲這呢歹。
（兄弟）阮不愛，阮不愛，阮不愛！
（二怪）掠恁到深山去悔改。
（兄弟）勿掠我，勿掠我，勿掠我！
（二怪）誰叫恁電動打袂煞。
（兄弟）勿掠我，勿掠我，勿掠我！
（二怪）掠恁來去修心學唱歌。
四、緊吼聲（詞曲/簡上仁）
我金子，我銀仔，到處不見恁的影，
我金子，我銀仔，到處聽無恁的聲。
這位先生，這位大兄，恁咁有看著二個囝仔子。
咁是鬼怪，咁是妖精，掠恁去拆食落腹炸油鼎。
恁阿爸，恁阿娘，不時甲恁疼命命，
我的子，嘸免驚，恁在佗位緊吼聲。
五、恆春民謠大師（詞曲/簡上仁）
[吟誦式慢板]
嘿！唱歌唸曲若神仙，有詩有歌著少年。
[輕快活潑]
思想枝，來唱起，予咱夜夜醉歸暝，
平埔調，有氣味，唱來續嘴真甘甜。
四季春，好歌調，糖甘蜜甜愛情謠。
牛尾絆，鑽心肝，出嫁新娘驚孤單。
你來唱，我來和，歡歡喜喜來相褒，
你來唱，我來和，快快樂樂唱山歌。
留言列表
